Россе суртанчан гойтам хургба вай мехка
27.10.2023 11:48
Россе суртанчий Союза доакъашхочун, ГӀалгӀайчен вахархочун Хоронько Игора балхаш го йиш хургья Илдарха-ГӀалий тӀарча Паччахьалкхен исбахьален искусствон музее, яхаш, дийцар «Сердало» газета корреспондентага музея зарбан болх лелабераша.
«Моттиг ювзаш» яха болам бахьан долаш, цхьан цӀерагӀа латта гойтам дӀабахьа вӀаштӀехьадоал. Кхоллама болх хьаллаьцар моттигерча Росреестра урхаллено, иштта ГӀалгӀай Республике гӀолла йолча исбахьален искусствон музейс. Цу кхетаче венача сага таро хургья 50 суртага хьажа, цар хозал бӀаргаго. Цул совгӀа, из кхетаче хьаеллаш, карарча шера ардара бетта 30-ча дийнахьа наьха таро хургья суртанчаца къамаьл де, хӀаьта ондаргашта лаьрхӀа а хургба говзанч-хьехам, цигара цхьацца шоашта пайдане хӀама хьаэцаргда цар. ЛаьрххӀа бола гойтам дӀаболалу 12:00 сахьат даьлча», - аьлар газетага культуран болхлоша.
