«ГӀалгӀай цӀаста пхьегӀаш» яха гойтам ба, мехкарча музее хьабеллаш
«ГӀалгӀай цӀаста пхьегӀаш» яха гойтам ба, Малсаганаькъан Тухана цӀерах йолча Наьсарерча музее тахан дӀахьош. Вай къаман наха лелаяь цӀаста кӀудалаш, кадаш, яьш, иштта кхыйола хӀамаш я цига хьокха оттаяь. Вай къаман говзанчаша хьаяь пхьегӀаш ший тайпара хозал йолаш, лакхача начӀалца, шоай мел йола говзал тӀаяхийта кхелла я. Из хоам «Сердалога» бир гойтам вӀашагӀбеллараша.
«ЦӀаста пхьегӀаш гӀалгӀай къаман вахаре лоархӀаме моттиг дӀалоацаш хиннай. Бежана нийса мах болаш, хиннай уж. Кхыча беса ала велча, пхьена луча хӀаман юкъехьош, халахетар даь, моллагӀа хатар хиннача луш, маьре йодача йоӀа поарталца хьош, лакха лоархӀам болаш, лелаяьй цӀаста хӀамаш. Укх бетта 16-ча денга кхаччалца, латтаргба гойтам, къаман юкъе еза лоархӀаш хиннача хӀамаех бӀаргтоха аьттув ба бахархой», - дийцар тха газетага.
«ГӀалгӀай цӀаста пхьегӀаш» яха гойтам хетабаьб гӀалгӀай къаман паччахьалкхен 100 шу дизара, цхьан моттиге чӀоагӀденна даьхача къамий метташ лорадара 10 шу дизара. Музее баьхкача бахархошта довзаргда; къаман дӀаьхий дола истори, культура.
