Мехктохкама музее довзийт гӀалай куц
ГӀалгӀай паччахьалкхен Малсаганаькъан Тухана цӀерагӀча мехктохакама музее болх беш ба гойтам, из хетабаьб ГӀалгӀайчен къаьнарча гӀалай архитектуранна. Цунна чуйоагӀаш я, ширача заман чухь кхерах хьалъетта гӀалгӀай гӀалаш, тайп-тайпарча шерашка даьха, наггахьа мара нийслуш доаца сурташ, иштта тамашийна, вай мехка геттара къаьнарча ханашка лелаяь, архитектуран оагӀонаш.
«Кулгаговзалца пхьоарал деш, искусствай начӀал долча говзанчас Оздой Мухьмад-Башира яь гӀалгӀай гӀалай кепаш, таханарча денга кхаьча, йолаш йолча гӀалай сурташ да. Цига хьажа баьхкарий таро я гӀалаш хьалъяра дола истори довза, гӀалгӀай къаман вахаре уж мишта лелаяьй ха», - аьлар «Сердало» газетага мехктохкама музея кулгалхочо Саганаькъан Мухьмада.
Гойтамерча хIамашка хьажа йиш йолаш ба, бахархой меттел, мехка хьаьший а. ХӀаранена корадергда цига шийна тамашийна хеташ дола сурт, хӀана аьлча тахан а лоаман ГӀалгӀайчен къайленаш ма ярра яйза яьннаяц.
ХӀара дийнахьа, тохкамаш деча говзанчашта, кердадараш кораду цу даькъ тӀа.
