Тӏема шерашка Ленинграде лаьттача хьалах дийцар Мужеча
«Вайна дицлургдац уж денош» яха Сийлахь-боккхача Даьймехка тӏема шерашка Ленинградера наькъаш дӏакъовларах этта хиннача хьалах дувцаш кхетаче дӏайихьар Мужечарча культран Цӏагӏа. Моцал ла ма могга дола унзара денош лаьттача хана, цигара нах духьала мишта эттар дувцаш моттиг хилар цох.
«Уж бирса денош дӏадовзийта хьежар кхетаче. Цхьаккха тайпара дӏачуваха, аравала йиш йоацаш, наькъаш къайлача хана, цига лаьтта хьал довзийташ дола сурташ, каьхаташ, видеош яр экрана тӏа гойташ, иштта цига хьекхар Ладожски ӏам тӏара «Вахара никъ». Ленинградера нах, турпалаш хинна, духьалъэттар цу ӏазапе хиннача деношта», - дийцар «Сердалога» кхетаче дӏахьош хиннараша.
«Блокада» яха документальни кино хьекхар цига. 872 дийнахьа лаьттача унзарча хана, цигара адам духьалъоттар мишта хиннад бӏаргадайра берашта. Къаьстта терко еш дийцар цу хана екъаш хиннача 125 грамм маькхах. Берашта хьалхадаьккхар, ер таханара маьрша вахар бахьан долаш вай даьша дукха халонаш лайнилга, дуккхача моттигех чакхбаьннилга, ца бохаш.
