«Укх деношка, ГӀалгӀай Республике гӀолла йолча МВД, иштта ГӀалгӀай Республике гӀолла йолча МВД юкъарлон цхьоагӀо лораеча полице кулгалхочун заместитела, полковника Кувалдин Василе кулгал а деш, кхетаче хилар ГӀалгӀайче дахача къамий викалашца», - аьлар хоамо.

Къайле йоаца къамаьл деш, дӀахьош хиннача кхетачене дакъа лоацаш бар республикан УОООП, ЦПЭ, УВМ МВД доакъой кулгалхой, миннаца, мехка тӀема комиссариата викалаш; гӀуозлой, афганций, гуржий, хӀирий, эрсий, таджикий вай республике болх беш йолча къамий культурай цхьанкхетарий кулгалхой.

Эпсараша дийцар ГӀалгӀай Республике гӀолла бокъонаш лораераша болх дӀа мишта хьу, ГӀалгӀай Республикан кхерамзлен Ӏалашо ярах. Цар иштта тӀахьийхар гулбеннараш, ГӀалгӀайчен лаьтта машар бара тӀехьара болх кагирхошта юкъе дӀабахьара.

Иштта белгалдаьккхар, мехка бахархошта, хьаьшашта юкъе цатоам баргбола хьал юстардаккха дезаш хилар.

Кулгал деш хинначо хьалхадаьккхар, къамий викалашта хьалха декхар оттаде дезаш хилар, из дувзаденна дар вайцига хьабаьхка бахача наьха, иштта моттигерча бахархой лерхӀам бе безаш хиларца, российски законаш массане а цхьатарра лораде дезарца. Из болх даим хьалбоахаш хила беза. ХӀара сага дӀахайта деза, зулам даь моттиг нийслойя е закон телхадеш хуле, из чӀоагӀача бехктокхаме хургволга. Къаьстта из доагӀаш да наха низ барца, нах сийсазбахарца дувзаденнача даькъ тӀа зуламаш леладерашта. Вай республике дахаш долча кхыча къамий викалаша, из хьал дика кхета а деш, массайолча оагӀорахьара полице болхлой хьаллоацаш ба а аьлар шоаш, уж хаттараш кхоачашдеча даькъ тӀа.

Из кхетаче дӀахьош хиннараша яхачох, республике дахаш долча къамашта юкъе барт хургбола хьал да из, цу тайпара кхетаченаш еш хиларо из хьал аттача а доаккх. Цул совгӀа, республикан МВД, вай мехка дахаш долча къамаша шоайла дикагӀа бувзам а лелабу.