Къаман библиотеке хьабийллар документальни гойтам
ГӀалгӀайчен Янданаькъан Жамалда цӀерагӀча Къаман библиотеке безбеш бар, Ӏоахарганаькъан Нураддин ваь 120 шу дизара хетабаь гойтам. Из вар гӀорваьнна гӀалгӀай Ӏилманхо, филолог-Ӏарбий мотт ховр, малхбоален истори довзар, хьехархо, таржамхо, дукха метташ ховш вола саг.
«Ӏоахарганаькъан ГӀаберта Нураддин Владикавказера Лоаман института физико-математически факультет яьккха вар, Дона-тӀарча-Ростоверча Къилбаседа Кавказа Лоаман НИИ Ӏилма болхло вар, из иштта Москверча ВЦИКа Президиума чуйоагӀача ГӀалгӀайчен автономни областерча массазарча викалашта юкъе бехктокхаме секретарь вар. ДӀадахача бӀаьшерен 20-ча шерашка, цо болх баьб математика хьехаш, иштта Сталина цӀерагӀча (КУТВ) Малхбоален къахьегамхой Коммунистически университете тӀема истори, топографи хьехаш, Москверча кхыча дешара моттигашка. Цул тӀехьагӀа 40 совгӀа шера цо болх баьб Москверча паччахьалкхен университете», - аьлар «Сердало» газетага ГӀалгӀай Республикан Къаман библиотекан къаман мехктохкама отделе.
Белгалдаккха деза, ГӀалгӀай Республикан Къаман библиотеке ГӀазданаькъан Радимас 20 шу хьалха кӀезига къахьеганзар Ӏилманхочун мах бола кхоллама дакъа ГӀалгӀайче кхоачаде гӀерташ. Тахан из дика лорадеш да республикан Къаман библиотеке.
