Бӏаргса доацарий Ерригроссийски юкъарлон 100 шу дизар белгалдир
ГӏалгӀайчен Янданаькъан Жамалда цӀерахча Къаман библиотеке лаьрххӀа йола кхетаче хилар, из хетаяь яр Ерригроссийски бӀаргса доацарий юкъарлон 100 шу дизара. Из ди белгалдеш дукха нах гулбелар, къаьстта цу организацеца бувзабенна болх дӀахьош, из хьаллоацаш бараш.
Кхетаче дӀахьош хиннар яр Къаман библиотекан «Дика хьалаш» яха Центр, иштта ВОС ГӏалгӀай моттигера цхьанкхетар.
«Кхетачен лоархӀаме дакъа хьадийллар «Дика хьалаш» яхача Центра, республикан культуран цӀихезача болхлочо Саганаькъан Адама, из ва ВОС республикерча даькъа кулгалхо. Цо даькъалабийцар гулбеннараш Ерригроссийски бӀаргса доацарий юкъарлон денца, иштта совгӀаташ делар ВОС Центральни правлене цӀерагӀа.
«Ерригроссийски бӀаргса доацарий юкъарлон 100 шу дизар» яха мейдилг, иштта дагалоаттама совгӀаташ делар ВОС ИРО хьинар дарашта, цар юкъарлон балха даькъ тӀа дукха къахьегарах. «ВОС Сийдола доакъашхо» яха наькх тӀа доалладу хьарак делар кхыча организацей викалашта, кхыча къаьстта болча наха, юкъарлон балхаш дӀахьош белгалбаьнна уж хиларах. Царна юкъе бар ГӏалгӀай Республикан НБ кулгалхо, Россе культуран цӀихеза болхло, «Россе библиотека гӀулакха белгалъяьнна болхло» яха цӀи лелаю Гӏазданаькъан Радимхан. Къаьстта цун хьинарах хьакхеллар «Дика хьалаш» яха библиотеканна чуйоагӀаш йола Центр, из я бӀаргса доацараш, иштта дика хӀама гуш боацараш хьаллаца кхелла», - аьлар «Сердало» газетага ГӏалгӀайчен керттерча библиотеке.
Саганаькъан Адама дег чура баркал аьлар ГӏалгӀай Республикан Къаман библиотекан кулгалхочунна, цо иштта дика бувзам лелабарах ГӏалгӀайчен моттигерча ВОС цхьанкхетарца, цахаддаш цунна таро луш лаьрххӀа йола хьалхара республике библиотека хьакхелла, цига бӀаргашта хӀама гуш боацарашта дика таронаш вӀашагӀйохкарах. Цо иштта баркал аьлар библиотекан берригача болхлошта, укх дукхача шерашка, «Дика хьалаш» яхача Центра болх дӀабахьа новкъостал лоаттадеш уж хьабоагӀаш хиларах.
