ГIалгIай къаман библиотеке довзийтаргда Бохтаранаькъан Зинаидай книжка
ХьатIадоагIача кIира Янданаькъан Жамалдан цIерагIча Къаман библиотеке поэзе, ашарий гойтам дIахьоргба. Оршот дийнахьа укхаза хургья литературно - ашарий кхетаче, цига гойтаргда байташ тIайола «Дегаца цхьаь» яха Бохтаранаькъан Зинаидай сборник.
«Бохтаранаькъан Зинаидай поэзи-таханарча литературе наггахьа мара нийслуш йоацарех я. Цун хIара мугI, шорттига аьнна, дагардар да. Цо дувц тахан хIаранена дагадоаллар: безам, лазар, сатувсар, дайнар», - аьлар «Сердало» газетага ГIалгIайчен къаман библиотеке.
Бохтаранаькъан Зинаидай керттера йоазон оамал я; ший дег чура дар яздеш а гойташ а хилар. Хьона духьала ягIаш санна, хул цун къамаьл, байташ; цо дувц бийсан наб ца яйтача бахьанах, сатоха Iемача дегах, дагадоацача диках.
Дешархочун корадергда цу тIа шийна дезар, дега гарга дола мугIараш, ше кхераш дар, сатувсар.
