Гӏалгӏайчен Къаман библиотеке журналистий кхетаче хилар
Дӏадахача оршот дийнахьа, Янданаькъан Жамалдий цӏерагӏча Къаман библиотеке кхетаче хилар. Из хетаяь яр журналистий барткхетара Денна. Цу дийнахьа СМИ болхлой тайп-тайпара ноахалаш гулделар республикан библиотеке, таханарча заман журналистикан дешаш дувца.
«Кхетачен керттердар - тамашийна библиографически гойтам «Вай къаман журналистикан нах» яха книжка. Цу тӏа да нахах дувцар, уж ба юххьанца денз журналистиканна хьалхалаьттараш, цун ӏадаташ вӏашагӏдехкараш. Цар вахара наькъо хьагойт истори мишта хьакхеллар, мишта дегӏаера мехка пресса, заман атта доацача хьалашка», - аьлар «Сердало» газетага Гӏалгӏайчен керттерча библиотеке.
Цига хилар, цу даькъа профессиональни викалаш санна, медиа даькъ тӏара хьалаш довзаш а дезаш а бола нах. Укхаза дийцар библиотекаша, СМИ шоайла бувзам лелабарах, иштта ветеранаша, къонача журналисташа балха говзал эцарах, кердача балха оагӏонех, технологеша дӏалоацача балха даькъах, таханарча заман журналистикан кепах.
