Россе турпалах, Келаматанаькъан Ӏалиханах, дувцаргда библиотеке
Россе турпал волча Келаматанаькъан Ӏалихана 55 шу дизара хетабаь гойтам ба, вай къаман библиотеке дӀахьош. Терроризм яхача унзарча зулама духьале еш, из во вай мехкара хоададе гӀерташ дукха къахьийгарех вар Келаматанаькъан Ӏалихан. Къилбаседа Кавказера из хоададара тӀехьа лаьттар из, ше яьккхача йӀаьха йоацача хана. Терроризма духьале еш вахар хаьда из саг, цӀаккха а вицлургвоацаш, вай дегашка ваха висав.
«Терроризма духьале еш болча Россе ФСБ оагӀон говза болхло, подполковник хинна Келаматанаькъан Ӏалихан эггара халагӀча, унзарагӀча хана терроризм яхача зулама духьале еш дӀабихьача боккхача балхах, шозза денал хилар белгалдеш йола орден яла оттавир. 2001-ча шера Пригородни кхале лозаваь хилар из, 2007-ча шера гуйран хьалхарча бетта 17-ча дийнахьа, шоашта дагадеха бӀеха гӀулакх кхоачашдир харцача наькъо тувлбаь лелача зуламхоша. Цун вахар хаьдачул тӀехьагӀа елар цунна РФ президента амарах Россе Турпал яха цӀи», - дийцар «Сердалога» библиотека болхлоша.
Къаман библиотеке дӀахьоча гойтамо гулбеннарашта бовзийтар цу майрача, деналах визза хиннача, ший къаман сийдолча виӀий атта хиннабоаца вахара никъ. Подполковник хинна Келаматанаькъан Ӏалихан доккха, хоза масал да тахан кхувш латтарашта.
Ший Даьхе езаш, къаман нахах дог лазаш, бӀехача, харцача хӀаман лар хоадае гӀерташ, ший са ца кходеш, лаьттар из вахар хаддалца! Из вовзаш хиннарий дукха дикаш да, тахан цох лаьца дувца. Иштта болча къонгаша лорабу шоай мохк, уж ба сийдола цӀи лелаераш. Келаматанаькъан Ӏалихана цӀи вай дегашка массахана боча, еза йолаш яхаргья!
