Гӏалгӏайчен къаман библиотеке, СВО доакъашхоех дола хьалхара журнал кхаьчад
Гӏалгӏай мехкарча Янданаькъан Жамалдий цӏерагӏча къаман библиотеканна совгӏата, «Турпалхой» яха мах бола хьалхара арадаьнна журнал делар, из хетадаь да Россе дӏахьош йолча лаьрххӏача тӏема операце бӏухошта. Гӏалгӏай Миннаца делар из библиотеканна совгӏата. Из журнал арахийцар дӏадаха шу чакхдоалаш «СВО доакъашхой ассоциаце», Гӏалгӏай мехкарча юкъарлон моттига новкъосталца. Из арадалар лоархӏаме да, исторически дагалоаттама къаман оагӏонга диллача, турпала тӏехьале йоаржаяра, кагирхошта патриотически кхетам балара.
«Цу дикача проекта автор ва – Хьаьшанаькъан Хьамзат (ӏалихан), из ше хиннав СВО, из «Турпалхочун никъ» яхача кулгалдара болхлой кийчбеча проекте дакъа лоацаш ва. «Турпалхой» яхача проекта маӏан да- бӏухошта, цига дакъа лоацаш мел хиннарашта, СВО декхараш кхоачашдеш латтарашта; карагӏдаьннар диц ца далийтар.
Цу тайпара кепайоазув арадалар, вайна чӏоагӏа лерхӏаме да. Цу журнала тӏа дувцаш дола биографей хоамаш, СВО бӏухоех лаьца дола дувцараш, цар балхах бола хоам вайна чӏоагӏа эшаш ба, тӏехьагӏа вайна из накъадаргда тӏехьенна кхетам балара, уж нийсача наькъ тӏа боахаш, Даьхенцара безам совбоаккхаш. Журнала тӏара сурташ даьхар ва цӏихеза суртанча Шивцов Евгений», - аьлар «Сердало» газетага Гӏалгӏайчен керттерча библиотеке.
Журнал дезалургда, дукхача вай республикан бахархошта. Цу тӏа дувц боккъонца дола вахара чоалхане наькъаш, бӏухошта хьалхашка нийсъенна халонаш, цар даьха толамаш - сий, декхар, Даьхенцара безам лорабар.
Библиотеке, Даьхенцара безам совбоаккхаш, кхетам балара даькъ тӏа леладергда из, дика масал да кӏоаргга уйла яра, турпалхой истореш довзара, уж хӏаранена гарга а бовзаш а хилийтара.
