Дешара Денна хетабаь гойтам хьабийллар къаман библиотеке
Дешара шу гаргагӀартара хетабаь гойтам хьабийллар, республикерча къаман библиотеке. Ахкан салоӀа денош чакхдаьннадеце а, дешара денош гаьна доацилга хьалхадоаккхаш ба берашта гойтам вӀашагӀбеллараш.
«Ишколе эшаш дола тайп-тайпара книжкаш да тха гойтаме оттадаь. Царца цхьана эрсий меттаца, математикаца, истореца, физикаца, химеца, географеца, астрономеца дезаш долча журналашка хьажа аьттув ба берий. Урокашка кийчбаларал совгӀа, олимпиадашка, яхьашка, викторинашка кийчо еш накъадаргда журналаш. Иштта гойтаме хьокха оттадаьд берий Ӏилман журналаш, царна юкъе да «АБВГД-фаьлгаш, ловзараш, урокаш» «Дешар-низ» яха журналаш. МоллагӀча темах шоашта эшар корадергда берашта цар тӀара», - дийцар «Сердало» газетага къаман библиотеке.
Ара Ӏимеца денош латтача хана, библиотекан шийлача, паргӀатача залашка дӀачуваьнначун самукъадаргда, гойтачох пайда эцаргба.
