ГӏалгӀай Республикан Халкъа Гулламе дийцар, мехка дешареи Ӏилмани Министерствон балхах
ГӏалгӀайчен аргӀанарча Халкъа Гуллама йоккхача кхетаче халкъа депутаташа ладийгӏар дешара, Ӏилман Министерствос 2025 шера баьча балхага. Из кхетаче лоархӀаме яр, республикан дешара лостамагӏа баьча балха мах оттабеш хиларах. Дешара, Ӏилман министра Цхьорой Ахьмад-Башира баьча балхах дийцар. Ше доклад ешаш, цо белгалдир, дешара политикан керттера декхараш кхоачашдеча даькъе лоархӀаме толамаш даьха хилар.
Цхьорой Ахьмад-Башира белгалдир, дешара моттигаш цхьан сменах хургйолаш балха боарам тӀа яхар керттерча декхарех цаӀ хилар. Министра яхачох, дӀаяха цу тайпара кхетаче хилча денз, из лоархӀаме вахара декхар кхоачашдара даькъ тӀа дикка дӏахьалха ваха таро хилар. 2024 шу дӀадолалуш 84 ишкол болх беш яр цхьан сменах. Дешара шу чакхдоалаш уж хилар 102. «Кагирхой, бераш» яха къаман проект, иштта «ДикагӀа мел дар - берашта» яха моттигера проект кхоачашъеш, тоаяьй ялх ишкол. «Кагирхой, бераш» яхача къаман проекта чуйоагӀаш ши берий беш тоаяьй. Белгалде деза, уж деша даха ха йоацача берий моттигаш хьалхара юкъеяхай тоаяра балхашта.
Йоккха терко лоаттаю кхувш йоагӀача тӀехьенна, Даьхенцара безам совбоаккхаш, кхетам балара. Республикан 25 ишколе хьадийллад мемориальни улгаш, иштта выпускникий сийна хетяь миӏингаш, лаьрххӀа йола тӀема операци дӀахьош бейнарий цӏерагӏа 95 ишколе «Турпалхочун парташ» оттаяьй»,-аьлар «Сердало» газетага ГӏалгӀайчен дешара, Ӏилман Министерстве.
Цхьорой Ахьмад-Башира дика мах оттабир карарча шера дӀайихьача ЕГЭна. Цо яхачох, экзаменаш дӀалуш хилара болх лерттӀа вӀашагӀбелла хиларах, берий таро хилар, паргӀатта шоашта ховр хьагойта. Дешархоша гойтар керттерча ӏилмаех шоаш дика кхеташ хилар, цо хьагойт хьехархоша дика царца къахьийга хилар.
Кхетаче дӀахьош, белгалйир дӀахойодача хана дӀаяхьа еза дешара оагӀонаш. Из да дӀахо дешара даькъ тӀара хьал дегӀадоаладе дезаш хилар, керда технологеш юкъеяхар, иштта хьехархой хьаллацар.
