Лаьттанцара каьхаташ бокъо йоацача тайпара тоадарах бехке веш ва Наьсаре хинна хьаким
28.02.2025 11:04
53 шу даьннача Наьсаре хиннача хьакима духьала гӀулакх хьадийллад шахьара прокуратуро. Бокъо йоацача тайпара лаьттанцара каьхаташ хийца хиннад яхаш бехке ву из тахан.
«Сердалога» из хоам бу Ӏаьдала болхлоша. Тохкамхоша белгалдечох, 2023-ча шера шахьара администрацерча юкъарча оагӀон болхло волаш, лаьттанца дувзаденнача кхаь каьхата бокъо йоацача тайпара кулг яздаьд цо. Цу каьхаташа кхаь вахархочунна 2000 кв. метрах дола лаьтта леладе бокъо еннай.
2023-ча шера из гучадаьнна хьаким балхара дӀаваьккхав, Магасерча кхален судо дувцаргда цун дош.
