Кхо гӀат дола ишкол хьалъеш боахк Наьсаре
Укх тӀехьарча шерашка дукха керда ишколаш хьалъеш, тоаеш латт вай мехка. 720 бера моттигаш луш йола кхозза вӀаштӀаръяь ишкол хьалъеш, боккха болх ба Наьсаре дӀахьош. Из хоам «Сердалога» бир гӀишлой балхах йолча Министерствос.
«Ишкол хьалъеча доазон тӀа дукха балхаш йистедаьхад, карарча хана. Пенаш урагӀхьош, гонахьара цхьацца балхаш йистедоахаш, боахк къахьегамхой. Ишкола коа хьалъяьй котельни, иштта кхыйола хӀамаш, хӀанз ков тоадеш боахк», - йоах тхогарча хоамо. «Дешар» яхача къаман проектага гӀолла, дӀахьош болх ба из гӀишлой балхах йолча Министерствос.
«Элитспецстрой» яха гӀишлош еш йола фирма я, из болх шийна дӀатӀаийцар. 640 миллион совгӀа ахча да цу балха хьахьожадаьр. Таханарча дийнахьа 58% хиллал болх йистебаьннаб цига. 2024-гӀа шу йистедоалаш, кийча хила езаш я ишкол бераш тӀаэца.
