Наьсарерча шин урама куц тоаде лерхӀ
«Кхераме доаца дика наькъаш» яхача беркатеча проектага гӀолла, Наьсарерча шин урама куц тоадеш болх дӀахьоргба. Из хоам «Сердалога» бир шахьара администраце. «Фабрични оалаш бола 1,53 км латташ бола урам геттара дукха машинаш, адам леларех ба. Цунца тоабе дӀаболабир ТӀаргам яха 1, 19 км латта цхьаькха никъ.
Из болх дӀабахьа лаьрхӀар Наьсарера администраци я. ДӀадахача салоӀаш хиннача деношка, арабаьлар болхлой къахьега. КӀалхара тиша асфальта бетон хьалъэцаш, керда никъ Ӏобилла кийчо еш боахк уж.
«Бахархоша теркалду, хам бу аьнна хет; шахьара моттигаш тоаеш болх дӀакхахьара. Цар шоаш дакъа лоацаш, эггара хьалхарча, керттерча аргӀагӀа хувцам бе беза моттигаш белгалъеш, дӀакхухьаш болх ба из»,- белгалдир шахьара да волча Йовлой Урусхана.
Теркалде деза, уж урамаш тоадарал совгӀа, Шаймиева, Могушканаькъан цӀераш лелаеча урамий куц хувцаш балхаш дӀахьош латтилга.
