Базорканаькъан цIерах бола урам тоабара болх дIаболабаьб тахан
Шахьара куц тоадарах йолча федеральни программага гIолла, Наьсарера Базорканаькъан цIи лелаю урам тоабе болабаьб. Мэрена духьаларча аллеера, плитка хьалйоаккхаш боахк болхлой карарча хана. Из хоам «Сердалога» бир администраце.
Керда тIо буллаш, лампаш ехкаш, гIандаш, нувхашта лаьрхIа яьшкаш оттаеш, хувцамаш дергда цига.
«Ерригача шахьара куц тоаде гIерт тхо, хIаьта къаьста цу урам тIа хувцамаш де деза дикка ха яр. Къаман беркатеча проектага гIолла, дIакхухьаш да уж балхаш, дIахойодача хана, кхален моттигаш тоаеш къахьега лерхI оаха», - белгалдир шахьара да волча Оздой Руслана.
Шахьара моттигаш тоаярах йолча федеральни программага гIолла, эггара хьалхарча оагIонца тоае еза моттигаш белгалъеш долча хоржамашта юкъе дакъа лаца йиш йолаш ба тахан бахархой.
