Моченаькъан оалача урам тӀара никъ тоабе арабаьннаб болхлой
26.03.2025 11:22
Моченаькъан оалача урам тӀара никъ тоабе дӀаболабеннаб къахьегамхой. Юбилейни цӀи йолча кхален хьал тахка вахача шахьара дас Оздой Руслана тӀадиллар, 400 метрага кхоачаш бола из никъ ма хулла сихагӀа тоабе, аьнна. Из хоам «Сердалога» бир шахьара администраце.
Ӏуррехь араяьннай болх дӀабахьа эшаш йола машинаш. Цу гӀулакхо хьагойт, бахархой дехараш администраце теркалделга. Цул совгӀа, хьатӀадоагӀа деза цӀай чакхдаьлча, цу моттигера коллектор хувцаш болх дӀахьоргба ЦаӀ волча оператора. Шахьара куц тоадеш, бахархой хьал аттачахьа доаккхаш гӀулакх да из.
