Наьсаре дикача спортсменашта совгӏаташ делар
«Магас» спорта Цӏен даькъ тӏа, совгӏаташ луш кхетаче хилар спортсменашца, уж бар российски а дунен а лерхӏамеча яхьашка котбаьннараш, яхаш, дийцар «Сердало» газетага мехка керттерча спортивни боахама зарбан болх лелабеча Гӏаппархой Аишас.
Сийлен грамоташ, иштта ахчан премеш яла дагахьа, Гӏалгӏай Республикан Паччахьалкхен Председатела а республикан Кулгалхочун а цӏерагӏа, спортсменаш болча вера Гӏалгӏай Республикан Паччахьалкхен Председатела хьалхара гӏонча Йовлой Мухьмад, иштта Гӏалгӏай Республикан спорта министр Белхарой Руслан. Цар баркал аьлар спортсменашта, цар иштта физически культура, спорта гӏулакх леладарах.
Совгӏаташ деннарашта юкъе вар армрестлингах дуненна шозза чемпион, дото совгӏат даьккха Тиймарзанаькъан Ибрахӏим; иштта армрестлингах могашал эшаеннарашта юкъе дунен чемпионата дото совгӏат даьккха Гаьгенаькъан Мухьмад-Амин, эллиной-румий латарах 2025 шера Россе Хьалхалеь яккхара яхьашка котваьнна Ӏарпенаькъан Рамзан, Бӏарахой Исмаӏал. Борза совгӏаташца белгалбир эллиной-румий латарах 2025 Россе Хьалхален чемпион Бӏарахой Мухьмад, иштта дото совгӏат даьккха Мазаев Турпал-Ӏаьла.
Ӏаьдало белгалбир 2025 шера шоай лоӏамеча латарах дунен Хьалхален котбалархой Хоаной Исмаӏал, Мухьмад-Тӏахӏир, дзюдо латара 2025 шера Европа Хьалхален котвалархо Хамхой Рахьим, дуненна Хьалхален дзюдох борза совгӏат даьккха Котанаькъан Муслим.
Къаьстта йола терко тӏаяхийтар тренераша Ӏарпенаькъан Ислама, Хамхой Исмаӏала. Саганаькъан Ибрахӏима беча балха. Царна делар Гӏалгӏай Республикан Паччахьалкхен баркал оалаш дола совгӏаташ, цар республикан спорт дегӏайоалаярах.
