Наьсарерча шоай доалахьара хӏама хьадераша дакъа лоац шахьар тоаеча
Моттигерча Ӏаьдало доал деш дола доазонаш тоадеча шоай доалахьара хӏама хьадеча наха дакъа лацарах, Наьсаре тоаденнад цхьадолча наькъий хьал, яхаш, хоам бу «Сердало» газетага шахьара мэре.
«Кхоартой Жабраила цӏерагӏча урам тӏа, доалахьара хӏама леладераш шоай юкъара хьинар, низаш вӏашагӏтеха, шоаш бол-болчара моттигаш тоае болабеннаб. Карарча хана, цар толамца дӏахьу асфальт биллара болх, шоаш къахьегача доазонашта гӏалий тӏа бахача наха тӏабахка аттагӏа хургдолаш. Духхьал урама куц эргадаьккха ца Ӏеш, цу гӏулакхо лелаш безамегӏа хургдола наькъаш кхолларгда гӏаш леларашта а машинашца боагӏарашта а», - белгалду хоамо.
Цул совгӏа, бувцача урам тӏа тоаде лерхӏ баьццара доазонаш, цу тайпарча эргалонаша, шеко а йоацаш, бӏарг хьестаргба моттигерча бахархой а хьаьший а.
Доалара къахьегам лелабераша дика тӏехьале йола бувзамаш шоайла леладар, гӏулакхаца а къамаьлаца а шахьар хозъеча дакъа лаца кийча хилар – дика гӏулакхаш карагӏдувлийта кийча болча наьха сакхетам лакха хилар.
