Наьсаре къахьегама шоатта ди дӀахьоргда
Наьсаре, бекарга бетта 26-ча дийнахьа къахьегама шоатта хургда. Цига керттера терко тӀайохийтаргья юкъарча доазонашта. Уж я «Шахьара дика хьалаш», Российски Федераце Президента могаяь хинна «Вахар, шахьара хьалаш» яхача федеральни проектех тайп-тайпарча ханашка тоаяь хинна моттигаш, яхаш, дийцар «Сердало» газетага шахьара администраце.
«Шоатта ди дӀахьоргда Ӏам болча даькъ тӀа - шахьара белгалон керттерча моттиге, иштта Наьсар-Керте, Дошлакъий-Юрта, Аьлтий-Юрта»,-аьлар хоамо.
Наьсарен мэре, шийна кертте Оздой Руслан волаш, бахархой бех Ерригроссийски марафоне дакъа лаца, шоай шахьар цӀенагӀа, хозагӀа хургйолаш.
Цул совгӀа, шоатта ди дӀахьоча моттиге бахархой таро йолаш ба шоашта бакъахьа хеташ долча доазон тӀехьа кхадж тасса, 2026 шера тоадергдолаш.
