«Бера дог гӀоздаккха» яха кхетаче дӀайихьар вай мехка
ХӀара шера дӀакхухьаш йола «Бера дог гӀоздаккха» яха беркате кхетаче дӀайихьар МагӀалбике. МагӀалбик кхале чудоагӀача дукха дезал болча фусамашкарча 300 бера совгӀаташ дийкъар. «Сердало» газетага из хоам бир из гӀулакх дӀахьош хиннача Охценаькъан Ислама.
«Дикача гӀулакхий дуне» яха гӀо деш йола ганз я из беркате гӀулакх дӀадахьа дагадехар. Иштта из болам дӀабахьара юкъе дакъа лоацаш хилар «Ихсан» яха ганз, «Дикача гӀулакхий гӀала» яха тоаба, «Кагирхой гӀулакхех дола цӀа», «Tooba» яха гӀо деш бола оагӀув. ГӀалгӀай къаман Ӏадаташ, культура, гӀалгӀай мотт шийна мишта хов гойташ йолча викторино чӀоагӀа тоам бир берашта. Иштта КъорӀа сураш деша ховрашта юкъе яхьаш дӀайихьар. Боккхийбараш а бар цу моттигаца сакъердалуш, царна лаьрхӀа лотореяш ловзадир. Ахчан совгӀаташ кхаьчараш а бар царна юкъе», - дийцар тха газетага.
Белгалде деза, «Дикача гӀулакхий дуне» яхача ганза хьалха латта Охценаькъан Зарема дуккхача шерашка из хоза гӀулакх вӀашагӀдоллаш хьайоагӀилга.
