ДогIан хиш дIаухаш йола моттигаш цIенъеш болх дIабихьар Наьсаре
19.05.2025 10:42
ДогIан хий дIаухаш йола моттигаш цIенъеш, цар болх тоабеш, къахьийгар Наьсаре. Белгалде деза, шахьара моттигашка хий цалаттийтара тIехьа из гIулакх хан-ханнахьа дIакхахьар лоархIаме долга. «Сердалога» из хоам бир шахьара мэре. Лотокашка хьаIайна хотта, гIаьнаш, нувхаш арайоахаш, хий боаггIача боараме дIагIоргдолаш къахьийгар ЖКХ болхлоша.
«Шоай цIеношта юхера хий дIауха моттигаш дIайикъача, ханнахьа тхога хоам беш хила, яхаш, дехар ду оаха бахархошка», - йоах ЖКХ болхлой хоамо.
Хан-ханнахьа уж моттигаш цIенъеш хилча, шахьара урамашка хьаIайна хий латтаргдац, хIаьта наькъий хьал лорадара тIехьа из чIоагIа лоархIаме да.
Наьсарерча хий дIаухача моттигашка тахан дIахьош бар аргIанара болх ба.
