Наьсаре хьалаьцар, «БМВ» яха машин унзара хехкаш хиннар
Россе ОГИБДД ОМВД болхлоша, вахара бувзамашка гӀолла болх беш, белгалдир Наьсарен-Шахьаре гӀолла «БМВ» автомобиль сиха хехкаш, бокъонаш телхаеш водитель хилар, яхаш, дийцар «Сердало» газетага республикан бокъонаш лораераша.
«Полице болхлоша сиха хьалехар автомобиль а, дукха нах болча моттиге машин кхестаеш хинна цун водитель а. Цига гучадаьлар автомобиль лоаллаш хиннар 18-шу даьнна зӀамига саг хиннилга. Машин а водитель а отделене Ӏочубигар», - йоах хоамо.
Бокъонаш телхаеш хиннар административни бехктокхаме озаргва РФ КоАПах доагӀаш ма хиллара.
Бокъонаш лораераша белгалду, цу тайпара машин лоаллаш вола саг машинаца нийсвелча, цо гонахьарча наха а кхыча водителашта а кхерам тувсаш хилар. Машинаш хьалхайоаларгах хехкаш, уж кхестаеш хилар, доал деча даькъ тӀа могадеш дац, из юхатоха дезаш да.
