«Министерствонна хьалха латтача Белхарой Руслана гулбеннарашта тӀадиллар, цу яхьашта боаггӀача боараме кийчо е аьнна»,- дийцар тхога. Турнире дакъа лоацаш хургбараш 700 саг ва, царна юкъера 400 ва 24 шерга кхачанза бола кагирхой.

«Спортсменаш Ӏерг бола моттигаш, дӀа-хьа кхувлар, деррига а боаггӀача боараме, цхьаккха кхерам юкъе боацаш, хила деза. Уж тайпара яхьаш вайцига хӀанз кхозлагӀа дӀахьош я, хьалха хиннараш лакха терко еш дӀаяхьа аьттув баьлар вай, иштта дӀагӀоргда аьнна хет сона из гӀулакх укх шера а. Доакъашхой, хьаьший вай мехка кхы а юхабахка безам хургболаш дӀачакхдаккха деза вай деррига», - белгалдир спорта гӀулакхех йолча министерствон кулгалхочо.

Хьалха «Сердало» газето хоам баьбар; «Магас» яхача спорта цӀагӀа Россе Турпалхочун Келаматанаькъан Ӏалихана хетаяь эллиной-румий оалача латарах йола яхьаш дӀахьоргья бекарга бетта 27-28 деношка, аьнна.