Бокъо йоацача тайпара къахьегараш гучабоахаш, болх дӀабахьа лерхӀ Наьсаре
2025-ча шера, къахьегамах йола чӀоагӀо йоацаш, къахьегаш вола 1000 совгӀа нах гучабоахаш болх дӀабахьа лерхӀ Наьсарерча хьакимаша. Белгалде деза 2024-ча шера хинначул шозза дукхагӀа из долга. «Сердалога» из хоам бу шахьара администраце. Шахьара мэр волча Оздой Руслана белгалдечох, къахьегама оагӀон гӀулакх боаггӀача боараме, Ӏаьдало дӀадеххача тайпара хилийтара тӀехьа дӀахьош болх ба из.
«Уж духхьал таьрахьаш хинна Ӏац, эзараш болх бе моттигаш, шахьара ганза хьал айдалар, бокъоно дӀадеххача тайпара къахьегара нах тӀахьехар да», - аьлар мэра.
Рейдаш дӀакхухьача тоабай керттера декхар хӀама хьадерашта гӀод тохар дац, хила деззача тайпара бизнес дӀаяхьар царна хьалхадаккхар да. ДӀадахача шера иштта болх дӀахьош 600 моттиг гучаяьккхар.
Шахьара дас сатувс, шу кхоачалуча хана цу оагӀонцара болх боаггӀача боараме меттаэтта хиларга. Иштта цо теркалдир, 2024-ча шера шахьара ганзе йоал чутелара болх, хьалха хиннача шера хьал теркалдича, 26,1%-га кхоачаш тоабенна хилар.
