Къаман проектага гӀолла шахьара куц тоадеш, болх дӀабахьа лерхӀ Наьсаре
Шахьара куц тоадарах йолча къаман проектага гӀолла, куц эргадоаккхаргда Наьсарерча йиъ моттига. Из хоам «Сердалога» бир шахьара администраце болхлоша.
«Деррига балхаш цӀеношкарча бахархошца бувзаме долаш чакхдоахаргда», - белгалдир мэр волча Оздой Руслана.
Программага гӀолла тоае лерхӀача моттигий дизайн-проекташ оттаеш болх дӀабихьаб. Плитка хувцаш, тока бӀоагӀий оттадеш, № 12, № 14 йолча цӀеношта юхе гӀандаш, нувхашта лаьрхӀа яьшкаш оттаеш болх дӀабахьа лаьрхӀа ба шахьаре.
Иштта Малсаганаькъан КӀарцхала цӀерах йолча парке Ӏотеха кхера хувцаш, гаьнаш, зизаш дӀадогӀаш къахьегаргда, Ӏарчакханаькъан цӀи лелаеча ураме гӀашлой никъ булларгба.
Хувца лаьрхӀад шахьарерча Ӏама гонахьа Ӏотеха кхера. Бахархой хьал паргӀатонга даккхара тӀехьа дӀахьош да шахьарера деррига балхаш.
