Прокурора Чербажанаькъан Ибрахӏима дакъа лоацаш, кхетаче дӏайихьар Наьсаре
20.11.2025 10:49
«Даьхен лорабой» яхача ганза моттигерча филиале, Наьсарерча прокурора Чербажанаькъан Ибрахӏима дакъа лоацаш, кхетаче дӏайихьар. Из хоам «Сердалога» цу моттигера бир.
«Шоашта къувларех, кхоачамбоацарех дувца йиш яр цига СВО доакъашхой, цар цӏагӏарча наьха. Бӏухошта терко лоаттаярах, цар хьашташ кхоачашдеш дӏахьоча балхах дийцар прокурора бахархошта»,- йоах тхога кхаьчача хоамо.
«Иштта йола кхетаченаш чӏоагӏа лоархӏаме я цу наьха вахаре. Моллагӏа шоашта къувлаш дола хӏама тахка йиш хул цар хьакимага гӏолла. Прокуратура болхлошца даиман бувзам хила безарех ба СВО доакъашхой, цар цӏагӏара нах, хӏана аьлча ишттача наькъаца дикагӏа меттадоаладе аьттув хул моллагӏа хӏама», - дийцар тхога «Даьхен лорабой» яхача ганза кулгал деча Оздой Муслима.
