«Майрала кӏопилг» яха болам дӏабихьар Наьсаре
Дарбанчешка дукха ха йоаккхаш дадача берашта лаьрхӏа болча, «Майрала кӏопилг» яхача гӏо деча боламе дакъа лаьцар Наьсарерча берий исбахьален ишкола кулгалхо, шахьара кхела депутат йолча Мержой Ладифас. Насаьрерча единороссаша къахьийгар дарба деш дадача берий дог хьаста тайп-тайпара ловзоргаш, книжкаш, иштта кхыйола царна эшаргйола хӏамаш гулъеш.
«Иштта долча гӏулакхо бера дог гӏоздоаккх, хӏаьта могаш доацаш, йӏаьхача хана дарбанче уллача бера геттара лоархӏаме да иштта терко яр, оагӏув хьаллацар. Боккхийбарий дегаш сомадоахаш дола беркате хӏама да из», - дийцар «Сердалога» Мержой Ладифас.
Теркалде деза, моллагӏа долча, цхьа доккха доацача хӏамо а могаш доацача бера боккха тоам белга, хӏаьта бера дог хьастарал дикагӏа фу хургда?!.
«Цаӏ йола Росси» яхача моттигерча парте оагӏон секретарь волча Бохтаранаькъан Ювсапа белгалдир, из лоархӏаме гӏулакх долга. Лазара духьала латташ дола бер чӏоагӏдеш, цун дог гӏоздоаккхаш, диканга сатувсийташ хургда из деррига.
«Майрала кӏопилго» дика доаржаде гӏерташ вӏашкаэзаб хӏанз кхойттазлагӏа. Хӏара дика мел деча хана; тхо шуца, шун оагӏув хьаллоацаш, шо дезаш да ала аьттув ба вай берашка!
