Наьсаре чакхъяьлар «ГIалгIайчен къона оазаш» яха яхь
Наьсарерча берий театра даькъ тIа дIайихьар шоллагIа Республикански вокально-инструментальни «ГIалгIайчен къона оазаш» яха конкурс, аьлар «Сердало» газетага театра, кинон, таханарча заман тароний Центра зарбан болх лелабеча Пхьиленаькъан Аьсета.
«Боккхийчар а бераша а гойтар шоай начIал, уж бар ГIалгIай Республикан цIихеза артисташ Эккажанаькъан Марина, Оздой Лейла, Эккажанаькъан Роза, Iарпенаькъан Аза. Солисташа, инструменталисташатайп-тайпарча жанрах йола кхоллама оагIонаш гойтар, цо кхы а сийрдагIа йир из кхетаче», - аьлар хоамо.
Проект вIашагIъеллача Гатагажанаькъан Илеза яхачох, «ГIалгIайчен къона оазаш» юха а гучаяьхар керда цIераш, царца мехка хургдолчунга сатувсилга еш.
«Оаха доаккхал ду хIара доакъашхочох, тешаш да цу тайпара хиларо кагирхошта низ чуболийт шоаш лаьрхIачунга кхачара. Оаха даькъалабувц берригаш а коталонца! Финале чакх ца воалаш висачунга дех догцаэккхар. Из тIеххьара яхь а яц, хIаране таро я ший начIал гойта ГIалгIайчен вахаре», - аьлар ше доакъашхошка къамаьл деш театра, кинон, таханарча заман тароний кулгалхочо Дзортанаькъан Мадинас.
