Машинаш юлача моттигашта тӀахьожам чӀоагӀбаьб мехка
21.07.2025 10:37
Кхорзаденна, Ӏимеца денош латташ, бахархошта хий дӀа ца кхоачача хана; геттара дукха хий доадеш болх дӀакхухьача машинаш юлача моттигашта тӀахьожам лоаттабу мехка. Цу гӀулакха лаьрхӀа тоаба вӀашагӀъеллай кхален администраце. Эггара хьалха уж бахар хий дӀацакхачарах машинашца хий тӀакхухьача Пхьилекъонгий-Юрта.
«Сердалога» кхален администрацера беча хоамах, цу юрта машинаш юлаш йола ши моттиг дӀакъайлай.
«Цхьацца йолча моттигашта духьала РФ КаАП 14.1-5 статьях лоткъамаш оттадир кхален администраце», - дийцар тха газетага.
