Даьхен лорабой Шу дакъовлаш, кхетаче хилар Наьсарен кхале
Даьхен лорабой Шу дакъовлара хетаяь кхетаче дӏайихьар Наьсарен кхалерча культуран Цӏагӏа. Цига белгалбир «СВО исторе оагӏонаш - берий кхолламца» яхача берий яхьашка котбаьннараш. «Бераша шоай кулгашца хьаеча хӏамай яхьашка дакъа лоацаш хилар Наьсарерча РДК суртанчий кружокера, иштта цун филиалашкара бераш.
Шахьара администраце, культуран оагӏонца къахьегараша цхьана дӏахьош проект яр из. Берий балхашка хьожаш хиннараш бар республикерча суртанчий Союза доакъашхой, «Даьхен лорабой» яхача ганза болхлой, иштта кхален администраци. Хьалхарча моттиге эттар Шоанахой Любас кулгал деш йола Гӏаьзе-Коара культуран Цӏа. Дакъа лоацаш мел хиннарашта лоархӏаме грамоташ луш, баркал кхайкадеш дӏаяхар кхетаче», - дийцар «Сердалога» цу моттигера.
Иштта цига кийчъяьяр мехкарча къаман артиста Хулаганаькъан Артура сценарех оттаяь концертни программа. Сцена тӏа баьнна къона эскархой Даьхенцарча безамах, лерхӏамах йола байташ ешаш, массане дог ураоттадеш бар. Наьсарерча РДК иллиалархо йолча Султиганаькъан Хадижас хоза илли даьккхар цига; иштта, массане геттара чӏоагӏа тӏоараш детташ, тӏаийцар къаман артист Оздой Адам. Наха тоам беш, кхетаче хилар цох.
