ГӀалгӀай паччахьалкхен 100 шу дизара хетаяь кхетаче хилар къаман библиотеке
«ГӀалгӀай паччахьалкхе - къам доаржадара оагӀув» яха, гӀалгӀай паччахьалкхен 100 шу дизара хетаяь, кхетаче хилар Шолжа-Шахьарерча къаман библиотеке. Цига гулбелар Халкъа Гуллама доакъашхой, Ӏилман, кхоллама болхлой, хьехархой, йоазонхой, студенташ, журналисташ.
XX-ча бӀаьшерен 20-ча шерашкара денз; къаман политически, культуран, вахара-экономикан оагӀонашка мел хиннача хувцамех дувцаш; докладаш йийшар цу кхетаче Ӏилманхоша-историкаша, архива болхлоша, мохк тохкараша. Кхетаче хьайийллар Халкъа Гуллама вице-спикер волча Пхьаранаькъан Руслана. ГӀалгӀай мехкарча йоазонхой Союза хьалхалаттача Ноакастхой Хаважа доклад йийшар цига. Цо дийцар, къаман литература хьакхоллаш хьалхалаьттарех, къаман литераторий балхех, иштта кхыдолча лоархӀамеча оагӀонех», - яхаш, хоам бу «Сердалога» къаман библиотекан болхлоша.
«Са ГӀалгӀайче» яхача лостамагӀа байташ, эссе язъеча яхьашка котбаьннарий цӀераш яьхар кхетаче. ГӀалгӀай меттала эггара дикагӀа йола байт язъяьй БӀарахой ЖӀовхьара, эрсий меттала язъяьча байташта юкъе белгалъяьлар Элиадзе Эльзира, «Эссе «Са ГӀалгӀайче» яхача оагӀонца къахьийгарашта юкъе хьалхара моттиг Тазенаькъан Раянайна елар. Грамоташ, совгӀаташ денна белгалбир котбаьннараш.
