Бохтаранаькъан Зинай байтий гуллам бовзийт къаман библиотеко
Ростове арадаьлар укх шера байтанча йолча Бохтаранаькъан Зинай толашагӏа йолча байтий книжка. Автора дуненцара безам, философеца дувзаденнараш дешаш волчоа гойташ я байташ. Къаман библиотеканна, иштта вай мехкарча кхыйолча моттигашта совгӏата ший байтий гуллам луш хилар доккхача деша автор. Ма барра цун кхоллам бовза аьттув ба мехка.
«Бохтаранаькъан ӏазиса Зинаида Наьсарера я. Ишколера яьлча, ЧИГУ физико-математически факультете дешаш хиннай. Литература цун дега дикка тӏехьагӏа дезаделар. 2015-ча шера язйир цо ший эггара хьалхара эрсий метталара стихаш, 2018-ча шера арахийцар ший хьалхара байтий гуллам «Син мерзаш». «Байтий библиотека» яхача къаман библиотека проектага гӏолла малхадаьлар 2022-ча шера «Сатийсар дайнача боадон юкъе» яха шоллагӏа книжка», - дийцар «Сердалога» мехкарча керттерча библиотеке.
Автора эггара дикагӏа йола байташ я тахан арадаьнначун юкъе гулъяьраш. Безамах, дуненах, гонахьарча вахарах, син эггара хьамсарагӏа долча хӏамаех лаьца я Бохтаранаькъан Зинай байташ.
