НИУ ВШЭ яйзар гӏалгӏай, нохчий культура, ӏадаташ
Къаман тохкама университета «Экономикан лакхарча ишколе» хӏара шера дӏахьош йола кхетаче хилар; студенташта, хьаьшашта гӏалгӏай, нохчий культурай тӏехьален мах бараш довзийтар. Из кхетаче дагаехар а, вӏашагӏъеллар а яр, «НИУ ВШЭ вайнаьха клуб»-студентий юкъарло, цо цахаддаш болх дӏахьу вайнаьха культура студенташта йовзийташ. Россе Президента чуйоагӏача массазарча викала фусамо, студенташа лаьрхӏа из дика гӏулакх хьаллаьцар.
«Кхетачен программа дика вӏашагӏъеллаяр. Цун керттердар дар студенташа шоаш кийчъяь лекцеш ешар. Шоаш къамаьл деш доакъашхоша йовзийтар гӏалгӏай, нохчий къамий тамашийна искусство, ноахалгара, ноахалга кхоачаш хьадоагӏаш дола ӏадаташ.
Кхетаче чакхйоалаш, концерт дӏахьош хилар Гӏалгӏай къаман цӏихеза артисташ Янданаькъан Тамара, Налганаькъан Лема. Цар самукъадаьккхар гулбеннарий», - аьлар «Сердало» газетага Гӏалгӏайчен массзарча викала балха новкъосташа.
Цига белгалйоалаш яр этнографе оагӏув. Хьаьшашта лаьрхӏа вӏашагӏъеллаяр гӏалгӏай, нохчий даарий оагӏув. Цул совгӏа, гулбеннарий таро хилар ӏадаташца дувзаденна вахар довза.
Студентий хьинаро таро лу культурашта, ноахалашта юкъера бувзам лелабе, дӏахо а Россе юкъара культуран оагӏонаш дегӏайоалае.
