Кердача Редантера керттера урам тоабе арабаьннаб болхлой
Бекбузаранаькъан цӀерах бола урам тоабе арабаьлар болхлой Кердача Реданте. Эггара хьалхарча аргӀагӀа тоае езача моттигий къоастам беш долча хоржамашка, бахархоша хержа урам ба из.
«№ 5 йолча ишкола тӀабодаш бола из урам керттерчарех лоархӀаш ба. Из никъ тоабаь баьлча, дикка аттачахьа дерзаргда юртара кхыдола наькъаш. Шахьара моттигаш тоае кхеллача федеральни программага гӀолла, дӀахьош болх ба из.
770 метрага кхоачаш болча наькъ тӀа асфальт буллаш, лампаш йохкаш къахьегаргда болхлоша. 7 млн ахча дӀадодаш болх ба из, контрактанна чудоагӀараш дӀалаьрхӀача», - дийцар «Сердало» газетага МагӀалбика кхален администраце.
Шахьара моттигаш тоаярах йолча федеральни программага гӀолла, дуккхача моттигий куц эргадаьккхад вайцига. Хьалхарча аргӀагӀа тоае еза моттигаш бахархоша шоаша белгалъеш, дӀахьош беркате болх ба из.
