«Республикерча 149 ишколо тӀаэцаргда 88 эзар совгӀа бер. Царна юкъера 9 эзар хьалхарча классе деша долха бераш да. Цхьан сменах болх беш хургья 75 ишкол, шин сменах - 74.

86 паччахьалкхен берий бешо тӀаэцаргда 24 646 бераш. Иштта студенташ тӀаэца кийча латт мехкара 7 юкъерча дешара моттиг», - белгалдир вай мехкадас Келаматанаькъан Махьмуд-Ӏаьлас, цу оагӀонца дӀахьоча балхах дувцаш.

Мехка кулгалхочо иштта теркалдир, гуйран бетта хьалхарча дийнахьа денз вай ерригача ишколашта керда Ӏилма юкъедоаладелга. Из да «Кхерамзленцара керттердараш, Даьхе лораяр» яха Ӏилма. Белгалде деза, дешара моттигаш лораяра тӀехьа тахан боккха болх лоаттабелга.

Ахкан хана массайолча ишколашка, берий бешамашка, куц эргадоаккхаш, балхаш даьд. Берашта деша паргӀатагӀа хургйолаш хьалаш хьакхоллаш къахьег мехка.

Цул совгӀа, ишколашкара спорта моттигаш тоаеш, кхетама хьал лакхдеш дола оагӀонаш, технопаркаш, таьрахьий дешарах йола «ӀT-куб» яха моттигаш хьаеллаш болх дӀабихьаб. Хьалъеш латт мехка кхы а керда дешара моттигаш.