УПЧ фусаме бахархой тӀаийбеш ди хургда
Республикерча дешара оагӀонца дувзаденнача массадолча хаттарашта жоп ха аьттув хургба мехкарча бахархой. ХьатӀадоагӀача пӀаьраска дийнахьа Магасерча сага бокъонех болча оагӀон фусаме бахархой тӀаийбеча дакъа лоацаш хургба дешареи Ӏилмани гӀулакхех йолча министерствон болхлой.
«Дешара оагӀонца дувзаденнараш бахархошта довзийтара тӀехьа, дӀахьош я из кхетаче. ХьатӀабаьхкарий хаттарашта жоп лургда цига, иштта бахархошта йовзаргья цу оагӀонцара шоай бокъонаш. ХӀара сага хаттар, лоткъам дикка тохкаш болх дӀахьоргба. ХьатӀавоагӀача сагага паспорт хила деза. Шийна къувлаш дола хаттар, ма дарра каьхата тӀа ӀотӀаяздаь, хьада деза цо», - дийцар «Сердало» газетага сага бокъонех болча оагӀон болхлоша.
Нах тӀаийбе дӀаболалургба, 10 сахьат даьлча. Из болх дӀахьоргбараш ба цу моттига кулгалду Пхьарчанаькъан Амина, дешареи Ӏилмани гӀулакхех йолча Министерствон болхло Мужахой Мадина.
