«Кхетаче дӀахьош, мехка къахьегама Министерствон кулгалхочо МутаӀаланаькъан Хьажбикара, «Дезал, нана, да, берал лорадара» ГӀалгӀай Республикан Закона 22 статьяйна юкъе хувцамаш дарах къамаьл дир.

Уж хувцамаш юкъедоах «Дукха дезал болча фусамашта вахара новкъостал де» №63 йола 2024 шера наджгоанцхой бетта 23-ча дийнахьа арадаьнна РФ Президента Указах доагӀаш хиларах. Цо белгалбу дукха бераш долча дезала вахара гӀо дара боарам, цунца чӀоагӀъю ха даим хургйола статус, иштта цу тайпарча наха деш дола керттера вахара новкъостал», - аьлар тхога из хоам баьчо.

Халкъа депутаташка министра хоам бир, паччахьалкхено берашта, цар даьшта-ноаношта тайп-тайпара новкъостал деш хилар.

Белгалду, социальни новкъостал лоаттадергда лакхехьа белгалбаьча дезала, доккхагӀа долча бера 18 е 23 шу даллалца, нагахьа санна из дешаш дале.

ГӀалгӀай Республикан Парламента депутаташа хьаллаьцар боккха дезал болча фусамашта вахара новкъостал лоаттадара тӀехьара тӀа юкъедаккха лаьрхӀар.