Салоӏа денош, ЖКХ оагӏонца доккха хатар доацаш, дӏадахар
ЖКХ оагӏонца цхьаккха доккха хатар доацаш, дӏадахар салоӏаш хинна денош. Цу гӏулакха бехктокхамечар боаггӏача боараме дӏабихьар шоай болх. «Сердалога» из хоам Мехкадаь зарбан болх лелабераша бир.
Болх боаггӏача боараме, бехктокхаме дӏабахьарах; бахархошкара лоткъамаш доацаш дӏадахар салоӏаш хинна денош вай мехка. Цу юкъа Илдарха-Гӏалий тӏара, Наьсарера ши трансформатор хийцар болхлоша; иштта, 15 трансформатор тоаеш, кулг техар.
Токаца цхьаккха кхоачамбоацараш ца нийслуш, чакхдаьлар уж денош, Даьла къахетамца», - дийцар тха газетага. Вай мехкадас Келаматанаькъан Махьмуд-ӏаьлас белгалдечох, укх бетта 1-ча денгара 11-ча денга кхаччалца йолча хана, нахагара хаттараш тӏаийдеча штабе 168 дехар денад, хӏаьта уж боагӏ-боагӏача болхлоша техкар.
Иштта газа, хин моттигашка нийсденна кхоачамбоацараш цу сахьате метадоаладир. «Наьха дехараш тӏаийдеча штаба балхах, хӏара дийнахьа хьадийцад сога. Доккха баркал оал аз, цу деношка болх дӏахьош, шоай декхараш бехктокхаме кхоачашдеш, лаьттача къахьегамхошта», - аьлар вай Мехкадас.
