ДегӀа могашал эшаеннача берий дог хьаьстар Шолжа-Шахьарерча кагирхоша
Шолжа-Шахьарерча доал дарахи, кердача технологехи йолча колледжа студенташа, укх езача хана, мерза совгӀаташ дeш, тоам бе лаьрхӀар дегӀа могашал эшаеннача берий дегашта. Из хоам «Сердалога» бир колледжа зарбан болх лелабеча Гадаборшанаькъан Хьавас.
«Хала боахкача дезалерча, унахцӀенон хьал эшаденнача берашта мерза совгӀаташ кийчдеш, чӀоагӀа раьза болаш хьайзар студенташ. Укх безача Рамадан беттаца уж даькъалабувца, кӀеззига даь а царна дикахетар де лайра царна», - дийцар тха газетага.
Иштта дола, Даьла духьа деш дола, гӀулакхаш хьаллоацаш хьабоагӀа цу колледже, къаьста терко эшача наьха дог хьаста аьттув лох хьехархоша, студенташа.
ГӀо дарал совгӀа, берашта хозахетар деш, терко еш цӀайца даькъаладувцар лоархӀаме да тахан. Хозача къамаьлаца хьаллацарал, дог ураоттадарал дикагӀа фу хургда дунен тӀа?!
