Хий дӀа-юха къестадеча турбан дакъа хувцаш, болх бергба Наьсарерча Юбилейни оалача моттиге
Юбилейни оалача кхале, юха а коллектор еха хатар хилар. Из сурт шахьаре каст-каста тайп-тайпарча моттигашка отташ да. Шахьара администраци, «Сердало» газета редакци йола Заводера моттиг хьаийцача а кхоачам ба.
Маца меттадоагӀаргда-хьогӀ из гӀулакх, яхаш, хьежаш ба-кх берригаш. Юбилейни оалача кхалера бахархой шоаш сатийсачунга кхаьчар ала мегаргдолаш да тахан.
Хатар хиннача хьажа вахача шахьара дас Оздой Руслана Рамадана денош дӀадоаллашехь, цигара хьал тоадеш болх дӀахьо, аьнна, тӀадиллар; иштта тишбенна никъ а хувца лаьрхӀар цига.
«Рамадана цӀай дӀадаьлча, хьатӀабоагӀача бетта дӀаболабергба болх. 200 мм йола толашагӀа йола турба чуюлларгья цига. Кхале Ӏочубодаш бола 220 метр йола никъ тоабеш болх дӀахьоргба администраце.
Бахархошкара хургдолча хаттарашта хьалххе жоп луш, белгалду, коллектор урама кхыча оагӀорахьа я, цунга хьежжа, из тоаеш болча балхо асфальта зе дергдац», - дийцар тха газетага администраце.
