Илдарха-ГӀалий тӀарча ДжабагӀанаькъан цӀерахча урама куц тоадир, къаман проектага гӀолла
ДжабагӀанаькъан цӀерах болча урама куц тоадеш, боккха болх дӀабихьар шахьаре. 2,43 километрага кхоачаш ба тоабаь урам. Кердача асфальтобетона наькъо аттачахьа доаккхаргда бахархой хьал, иштта дӀа-хьа ухача машинашта а йоккха паргӀато я из.
«Шахьарерча керттерча урамех лоархӀаш ба ДжабагӀанаькъан цӀерах бола урам. Шахьарерча поликлиниканна, МВД моттига, ГӀалгӀай индустриальни колледжа, Паччахьалкхен музея тӀабодаш, лоархӀаме никъ ба из. Кердача наькъах доккха совгӀат хилар хӀара денна цига гӀолла дӀа-хьа ухарашта», - дийцар «Сердалога» машиний наькъий гӀулакхех йолча Министерстве.
Вахара моттигаш тоаярах йолча къаман проекта тӀехьа, дикка къахьег тахан мехка. Къаьстта наькъаш тоадара болх дикка гаьнабаьннаб укх шера. Тоабе лаьрхӀа хиннача 11 наькъах, ворхӀ моттиг тоаяь яьннай. Болх боаггӀача боараме дӀабахьар да из. Наькъаш тоадара болх лоархӀаме моттиг дӀалоацаш ба мехка.
Цунна чудоагӀа наькъашкара бокъонаш йовзийташ дола улгаш (гӀармаш) хувцар, наькъашка басарашца къоастам бар, гонахьара моттигаш меттайоалаяр.
