«Самарски областа П.В. Алабина цӀерагӀча историко-мехктохкама музее, маьцхали бетта, 29-ча дийнахьа денз 31-ча денга кхаччалца музеера гӀирсаш, иштта «ГӏалгӀайче. Гӏалай, говзанчий мохк» яха гойтам го йиш хургья.

Царна юкъе да къаман тӀадувхаду гӀирсаш, чкъаьран цӀоках даь сурташ, фертах даь къувсаш, дахчан, аьшка пхьараша даь балхаш, цӀагӀа леладу гӀирсаш. Уж шеддар довзийтаргда ГӏалгӀайчен исбахьален искусствай Паччахьалкхен музея болхлоша.

Цига гойтаргба 200 совгӀа тамашийна хоза баь болх. Безам бараш бех цу музее дӀахьоргболча говзанч-хьехамга хьажа. Из дӀахьоргба суртанчаша, ГӏалгӀайчен кулгаговзала йолча наха.

Самарски областерча паччахьалкхен филармоне, маьцхали бетта 31-ча дийнахьа концерт лургда «ГӏалгӀайче» яхача Хамхой Ахьмада цӀерагӀча Паччахьалкхен филармоне халкъа халхара ансамбло», - аьлар «Сердало» газетага моттигерча культуран Министерствон зарбан болх лелабераша.

Самарски областе дӀахьош дола ГӏалгӀай Республикан денош шин моттига юкъера культурани экономическии бувзамаш чӀоагӀдарга боаккхаш бола лоархӀаме гӀа ба.