Юкъерча Ачалкхе дӏахьош ба, тӏий тоадеш бола болх
20.10.2025 17:11
«Гӏалгӏай Республикан автомобильни наькъаш дегӏадоаладар» яхача паччахьалкхен программанна чудоагӏаш, тоадеш да Магӏалбика кхален Юкъерча Ачалкхера тӏий, яхаш, дийцар Гӏалгӏай Республикан Минавтодортранса зарбан болх лелабераша.
Карарча хана болхлой хиш дӏаухаш йола моттигаш еш, гидроизоляци еш ба. Болхлой тешаш ба, шоаш кастлуш асфальт ӏобилла болалург хиларах, тӏаккха 40 метр дӏаьха тӏий кийча хургда.
Белгалду, 9 метр хинна къаьна тӏий, тоадаьчул тӏехьагӏа шерагӏа хилар, 25 метрага кхаччалца.
