Южнера хин хьал тоаде арабаьннаб болхлой
Юрташкара хьал тоадарах йолча паччахьалкхен программага гӀолла болх дӀахьош, МагӀалбика кхалерча Южнера хин хьал тоадеш боахк болхлой. Юрташка бахача наьха вахара хьал аттачахьа даккха вӀашагӀъеллай из беркате программа.
«Эггара керттерчарех да, керда хин турбаш Ӏочуяхка ор даккхар, хий дӀатӀадахьар, гӀувнаш оттаяр. КӀалхара тишъенна турбаш пайдане йоацача кхаьчай, дукха хьовзам хиннаб царца. Деррига хин дӀоахал 10 км кхоачаш да. Карарча хана, 60%-га кхоачаш, болх йистебаьннаб. Федеральни оагӀоно хьахьожадаьча 29,7 млн рузкъах 17,5 млн сом ахча дӀадахад болх беча. Оттаяьча ханага хьежжа, дӀахьош ба из болх», - дийцар «Сердало» газетага МагӀалбика кхален администраце.
Керда турбаш чуяхкарал совгӀа; цӀаьхха, хатар хинна болх хуле, хий дӀакъовла йиш йола гӀирсаш оттадеш латт цига. Цу гӀулакхо дикка тоадергда наьха вахара хьал, хицара кхоачамбоацараш юстара дусаргда.
Бахархошта доккха совгӀат да керда хий чудиллар. ХьатӀадоагӀача шера йистебаккха лерхӀ беррига болх.
