Магаса «Ишкол 21» оалача дешаргдараш харжа болабаьб
Магаса «Ишкол 21» оалача моттиге дӀаболабаьб карарча шера дешаргдараш харжара болх. Шин кӀира, шоашта ховр гойтаргда 200 совгӀа сага.
«Таьрахьашца дегӀаахара Академе дешара бокъо йоаккхаш ба Нохчий Республикан, Селий мехка, Къилбаседа Хӏирийчен, Краснодарски края, Тюменски областа, Санкт-Петербурга, иштта кхыча вай мехкарча моттигий викалаш. Царна юкъе ба вайцигара бахархой, уж лаьрхӀа ба дика ИТ-говзанчаш хила. Берригаш дӀалаьрхӀача, 70 % кагийнах ба, юхебисараш - 23% мехкарий. Царна юкъе ба шоай гӀулакх дика каралаьцараш а, программироване хьал довза хӀетта мара дӀаболалуш боацараш а», - аьлар дешара моттиге.
Шин кӀира дешархоша шоаш хьагойтаргба юххьанцахьа дӀайолаеча программированеца, цар боккъонца дола декхараш кхоачашде дезаргда, тоабаца цхьана болх бе, ма хулла ИТ-хьалашта гарга йола дешара кеп йовза.
Дешара моттига кулгалхочо Колой Руслана яхачох, доакъашхошта цо нийсхонца жоп лургда, кийча бий уж шоай хургдар ИТ оагӏонца дувзаде яхача хаттара, хӀаьта ишкола тоабанна ховргда сага мишта уйла ю, мишта деш, хаттараш мишта кхоачашду гургда.
Хьалхадоаккх, «Ишкол - 21» мехка столице хьайийллай, таьрахьашца дегӀаахара Академе, тахан ИТ даькъ тӀа эшаш бола говзанчаш кийчбара. Из хьайийллар ва ший доалахьарча хӏаманца къахьегаш вола, мецената никъ лелабу Гуцаранаькъан Микаил.
