Келаматанаькъан ӏалихана цӏерах йолча Шолжа-Шахьарерча № 4 йолча ишколе, Даьхенцарча безамах йола лекци йийшар
Шолжа-Шахьарерча Келаматанаькъан ӏалихана цӏерах йолча № 4 йолча ишколе йийшар «Даьхенна ший турпалаш бицлургбац: Сийлахь-боккхача Даьймехка тӏема сийдола доакъашхой» яхача темах йола лекци.
«Сердалога» из хоам бир «Даьхен лорабой» яхача ганза зарбан болх лелабеча Джандиганаькъан Мадинас. Дешархошца къамаьл де баьхкабар «Кхетам» яхача Российски оагӏонцара лектор, Даьхенцара безам чӏоагӏбарах йолча проектий оагӏонцара керттера болхло Евкуранаькъан Расул, СВО ветеран, «Даьхен лорабой» яхача ганза болхло Хазанаькъан Ибрахӏим.
Кхетаче дийцар 1941-ча шера этта тӏом дерригача дунен истореца малагӏа лар юташ хилар. Фашист вохавеш, вай лаьтташкара эккхавеш, котало гаргайоалаеш лаьттарий цӏераш вайна массахана хьамсара хила езилга белгалдир хьаьшаша.
Берашта дийцар маӏача наха нийсса майралца немцечоа духьаллаьттача кхалнахах-партизанех (лорий йижарех, иччархоех). Цига хьоахадир тӏема операцена юкъе Украине латтача вай къонгех. Хӏара саг ший Даьхенах дог лазаш, цун моттиг лораеш латта везилга хьалхадаьккхар къонабарашта.
