ГӀажарий-Юртарча №5 йолча юкъерча ишколе, Рамадан бетта хетаяь кхетаче хилар
Шолжа кхален ГӀажарий-Юрта №5 йолча ишколе кхетаче хилар, из хетаяь яр лаьрххӀа болча мархий бетта, яхаш, дийцар кхален администраце зарбан болх лелабераша.
Дешархошца кхетаче дӀаяхьа вена хилар Шолжа кхален кулгалхочун гӀонча, иштта гӀалгӀай Ӏадатий ишкола кулгалхо Ӏалбаканаькъан Хаваж, ГӀалгӀай Республикан цӀихеза культуран болхло Малсаганаькъан Ахьмад, ГӀажарий-Юртарча маьждига имам Бобхой Мухьмад.
Хьаьшаша дийцар берашта, марха кхабар мел деза да, 14-15 шерга кхаьчача сага из кхаба дезаш хиларах. Иштта цар берашта хьалхадаьккхар мел дукха дика дахь сага цу безача бетто. Царех цаӀ да цу бетта КъорӀа лаьтта доссадаь хилар, из эзар бийсал дикагӀа лоархӀ дийшача наха.
Цу юкъе дийцар мархаш доасташ йолча ханах лаьца. Укхаза дукха безаме къамаьл хилар, берашта дийцар дӀаяхача ханашка из цӀай мишта дездора, иштта хьехамаш дир берашта мархаш а цун тӀехьа доагӀаш дола цӀайш а лерттӀа дӀадахьара.
