Даьймехка турпалий Ди дездир Галашка
Даьймехка турпалий Ди дездеш хилар, Галашкарча культуран Цӏагӏа. Боаггӏача боараме шоай тӏема декхараш кхоачашдеш лаьттача къаман къонгий цӏераш йовзийтар цига. Из хоам «Сердалога» бир «Даьхен лорбой» яхача ганза мехкарча филиала болхлоша.
«Россе турпал волча Къоастой Ширвани гаргара саг йола культуран оагӏонцара цӏихеза болхло Абдурзакова Аьсет, Россе ОМВД ОП болхлой, тӏема операцен ветеранаш, иштта кхыбараш бар цига гулбенна. Галашка баьха турпалаш дагалаьцар цига: Къоастой Ширвани, Базгенаькъан Артагӏа, ӏарапханаькъан Марем. Культуран Цӏен литературан-драматически кружокерча бераша турпалашта хетаяь байташ йийшар цига, царна хетадаь иллеш дӏааьлар. Иштта цига вӏашагӏбеллабар «Массане а цӏераш яха вай» яха книжкай гойтам», - дийцар тхога «Даьхен лорбой» яхача филиала болхлочо ӏарапханаькъан Мухьмада.
